政壇：CY夫婦逛工展 掃貨助社企

一年一度工展會尋日開鑼，特首梁振英（CY）同太太唐青儀喺開幕禮後就帶頭掃貨，佢哋行咗幾個社企攤檔，梁太都頻頻有收穫，原來梁太鍾意「呷醋」，佢喺有機食品店試飲咗一杯「美人桑椹醋」後，就一口氣掃咗兩盒，仲掃多盒「青澀梅果醋」添。之後又睇中一個由南亞裔婦女手製嘅手提包，盛惠二百五十元。

桑椹主治暈眩耳鳴、心悸失眠，唔知梁太買嘅果醋係畀自己定買畀老公CY呢？一向鍾意耕種嘅CY就對花特別有興趣，無論係真花盆栽定係手作假花都有買，連埋一啲小擺設，總之行咗唔夠半個鐘就使咗成一千二百元，幫助社企之餘亦滿載而歸。教育局局長吳克儉尋日都買咗兩隻佛手果潤喉，佢話曾經喺台灣見過五年嘅佛手果要過萬元一隻，尋日嘅當然冇得比，所以百幾蚊就有交易囉。佛手果有理氣化痰、舒肝和胃、改善食欲不振等功效，莫非吳局長近期好大壓力？