政壇：葉劉自爆嘥公帑傳聞

立法會議員聘請助理有嚴格規定，新民黨主席葉劉淑儀近排就因為女兒葉榮欣（Cynthia）幫手做嘢，捲入咗利益衝突疑雲。葉劉淑儀尋日就喺社交網站專頁上自爆兼拆彈，佢話有人懷疑佢用立法會資源、亦即使用公帑聘用女兒做助理，仲調查添，葉劉淡定咁聲言件事只係「得啖笑」，因為女兒係新民黨所聘，但孭住職員證出入立法會方便工作，葉劉仲反建議立法會秘書長陳維安，應該設計多一種證件供黨嘅職員使用。

Cynthia係美國知名大學嘅高材生，做議會工作都好正路，不過，立法會為咗防微杜漸，一向有規定唔可以聘任親屬，以避免公帑被議員私相授受，衍生利益衝突等問題。因此，當Cynthia經常戴住由立法會秘書處發出、「葉劉淑儀議員辦事處」的職員證出入立法會大樓時，就引嚟上述疑慮。

倡立會發「義工證」

葉太話，有人誤會佢用公帑聘請女兒做助理，呢個並唔正確，因為Cynthia只係新民黨職員，由新民黨支薪，而且該黨好多職員都持有立法會「議員職員」證，方便出入立法會，應該話係用新民黨資源「補貼」立法會至真。

為咗釋除大家疑慮，葉太就諗出兩個解決方法，包括叫Cynthia少啲去立法會，其次係建議立法會秘書長陳維安設計多一種證件，叫「議員義工」證，咁佢啲義工就可以名正言順咁入立法會喎。陳維安拿拿臨回覆話，已收到葉太嘅意見，會研究點防止呢啲誤會。