SUN微博：打橫嚟講：有人工加，但不快樂！

香港政府突然宣布法定最低工資水平，由時薪二十八元增至三十元。

有人工加，而且係最低層嘅勞苦階層嘅打工仔受惠，本應好開心才對吧！二十八蚊的最低工資，已是兩年前的水平，這七百幾日以來，社會物價飆升咗幾多呢？

家陣，多加兩皮，得嗰百分之七，還追不及經濟通脹的幅度，真係揸住呢啲雞碎恩惠，唔知好笑定好慘？仲有呀！話加話加，就算立法會無人玩嘢反對，都要等到出年五月才實施呀！呢半年，聽住先，有得睇，無得使呀！

香港社會民生問題，充滿詭異矛盾。提升工資，得益的，是廣大的小市民嗎？當然不是啦！羊毛只會出在羊身上，人工加了，老闆做生意的成本亦高了，為保持利潤，咪將成本加諸消費者身上去承受囉！睇住吖！出年五月未到，今日風聲話咗增加最低工資水平，老闆們早着先機，一定會帶頭打響算盤搵着數！加風明日就來的了！

香港政府勢弱，為求表現，加大力度去擸功績、博掌聲，嗱！搞完最低工資，唔知會唔會傻到提交「最低工時」出來「討論」？

其實，香港生意難搞，人們生活不快樂，除咗政治不穩、官員無能外，就是地產霸權橫行，租金畀佢哋吞晒。好啦！即使政府向小市民狂派糖，最終的甜頭，也只能益咗地產佬；還有，香港一日無工廠生產業，一日都只能苦下去，這是不快樂的根源呀！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊（目及）實政府

email：sunweibo@opg.com.hk

「就係咁爆」網址：tv.on.cc/hot