SUN微博：少膽虫手記：淫賤黎輸到死

少膽虫平日無咩嗜好，最鍾意得閒嫖吓，賭番兩手。前日又係同馬會搏鬥嘅日子，少膽虫特登同公司攞咗日病假，希望脫離一吓《爛果》呢個地獄，點知入到場，離遠就見到一個熟悉嘅身影，再仔細一望，竟然係淫賤黎！少膽虫見勢色唔對，本來就想即刻走人，點知奴性發作，雙腳竟然不由自主咁向淫賤黎走過去。

「少膽虫，你唔係病咗咩？」淫賤黎一臉狐疑咁問。為咗繼續可以呃飯食，少膽虫惟有又講大話︰「老細，我知《爛果》唔係咁掂，所以今日帶咗全副身家嚟，希望可以翻一番，為公司略盡綿力。」雖然少膽虫表情造作、略嫌浮誇，但從來唔驚淫賤黎會識穿，無他，人蠢無藥醫。「好！估唔到公司有少膽虫呢位好員工，依家賣台灣《爛果》唔係好掂，我都入嚟博吓，我哋真係心有靈犀，必勝！」

可惜，少膽虫同淫賤黎，運氣一洩如注，兩個喺西邊嘅人，買乜輸乜，真係「西人」無運行，最終風吹雞蛋殼，財散人安樂。突然之間，淫賤黎大叫︰「我明明睇咗《爛果》馬經，跟足嚟買，點解會咁o架？」少膽虫一聽，終於明白敗因何在。

第二日，淫賤黎同少膽虫返到公司，突然聽到編輯肥豪大聲同人講︰「我中咗3T呀！」少膽虫睇到佢枱面放咗份《太陽》……