政壇：搞搞政：大輝皮厚唔怕廠商會摑

廠商會嘅立法會代表林大輝最近言論出位，先有雙手合十大師上身，話特首CY梁振英被揭僭建係「因果循環，報應不爽」，而狠批CY時更成功贏得唔少反CY人士嘅掌聲，但事後佢嘅幕後「老闆」廠商會高調發稿力撐CY，變相狠狠摑佢一巴。

可能佢面皮厚，竟然摑完唔知痛，前日佢更喺泛民主派提出嘅特首不信任動議中投贊成票。但事隔不足二十四小時，唔知佢係知衰抑或想先發制人，突然發信畀廠商會仝人解釋。佢形容投贊成票目的唔係要特首下台，只係希望CY視呢個動議為警惕，揚言「完全係出於真心為香港好」喎！擺明為自己投票補鑊。

據聞大輝今次明目張膽再反CY，喺廠商會內部造成好大回響，有人認為佢疑似挾持廠商會個名搞私人恩怨，之後點「補鑊」都只係遲來嘅春天，一陣影響廠商同政府嘅關係，損失就大喇。話時話，人最緊要係飲水思源，大輝再度連任議員離唔開廠商會支持，佢再係咁我行我素嘅話，相信只會陷廠商會於不義，對雙方繼續合作又有乜益處呢？