政壇：KK豎拇指fb報平安

前日突然因病入院嘅民協立法會「超級」議員KK馮檢基，自稱睇嘢有疊影，大動作同行路都見頭暈，仲會嘔添，頓時惹起各界關注佢嘅病情，擔心有乜依郁就要補選超級議席，亦聯想到佢未能就特首梁振英嘅不信任動議投票，真係夾都冇咁啱。可能因為咁，KK尋日就主動喺社交網站（fb）上載一幅自己留院嘅相片，向大家派定心丸。

幅相見到佢喺病床上，隻右手插住吊鹽水嘅導管，好似冇乜精神咁，但佢左手依然高舉拇指，示意自己仲撐得住，叫大家唔使擔心。呢幅相喺網上即時被廣泛流傳，好多網友都叫佢慢慢休息，連民政事務局政治助理徐英偉都有慰問。有人八卦問佢究竟係乜嘢病，但佢似乎唔想透露病情，只係話聽日會復出喎。