SUN微博：少膽虫手記：認真你就輸了

少膽虫自從跟咗淫賤黎，咩道德良心、咩人格尊嚴，早就拋諸腦後。尋日，少膽虫拜讀咗《沙膽虹手記》，佢話攝記遇到人命危急之際，佢哋會揀救人，而唔係影相，仲話人人心中有把道德嘅尺，傳媒最好唔好越界喎！

睇完之後，少膽虫嘅良心之火又再燃起，即刻搵淫賤黎傾吓。誰不知，淫賤黎聽完我感人肺腑嘅陳詞，竟然笑到碌咗落地，仲話︰「少膽虫，你第一日跟我咩？我不嬲唔出呢啲人命相o架喇。」少膽虫又忍唔住衝口一句︰「有啲咁嘅事？」呢個時候，淫賤黎一臉不屑咁話︰「少膽虫，《爛果》有二字真言，一係淫，另一係假。你知唔知點解我叫『淫賤黎』？我淨鍾意登啲囡囡相，事業線愈長，個樣愈淫；件衫愈少布，我就愈鍾意登。啲血淋淋嘅相，搵鬼睇咩？」

淫賤黎愈講愈有火，「仲有，依家新聞係求真o架咩？好睇先係最重要，所以假假哋有咩所謂！」一向細膽嘅少膽虫自然就問︰「我哋成日都畀人投訴失實，好麻煩o架喎。」淫賤黎聽到，即刻發晒忟憎，「少膽虫，你個人真係《哈你波特》七集頭七個字加埋呀！」 「神消阿火鳳混死？」少膽虫一面狐疑。「係哈哈哈哈哈哈哈，你個人真係好笑，畀人投訴咗咁多次，有邊次有事？認真你就輸了。」淫賤黎說畢，拂袖而去，嗰刻少膽虫覺得自己又學到嘢。