SUN奇古怪：Sun潮語【黑C】

好多潮語其實都係嚟自網絡，自從有咗互聯網，繼而討論區同社交網絡普及咗，實在有利潮語傳播。以前嘅時代，一班friend玩埋一齊實有自己friend先會明白嘅口頭禪，好難傳開去。但依家多得有互聯網，有啲得意有趣嘅詞彙同諗法，比以前更容易讓人知道。好多新發明嘅詞語或一啲網絡簡寫，好易一傳十十傳百，走入日常生活，潮語因而誕生。

早幾年好多人叫網絡文字做「火星文」，即係話年輕人用嘅網上用語係火星人先會睇得明。因為好多火星文都係簡化版嘅文字，例如「you」會簡化為「u」。早年曾有多名學者擔心咁樣會令下一代文字能力退化，但好多當年嘅「火星文」已經成為我哋日常生活嘅一部分，甚至好多報章傳媒都會用到呢啲字做標題！喺中英夾雜嘅香港，呢啲網語經常都係中英雙翼齊飛。包括其中一個就係「黑C」！

提到「黑C」，我諗好多男網民都會會心微笑！因為通常「黑C」呢個字都係同女有關，亦不時出現喺網上「甜故」入面。網絡潮語「黑C」，實情就係「黑絲」，即係「黑色絲襪」嘅簡稱。無論邊度都有好多男仔沉迷「黑C」美腿，一見到着「黑C」嘅女仔當堂醒神起嚟，有啲甚至會偷拍穿「黑C」嘅美腿少女，並且放上網公諸同好，呢啲當然係犯法行為，我絕不鼓勵。

好多女性都唔明點解男仔會咁鍾情「黑C」，其實男仔睇女仔有幾個重點，有啲會特別着眼「胸部」，而有啲就沉迷一雙「美腳」。有香港作家講過，男仔成長過程中，對女性身體部位喜好會隨年紀向下移動，年紀愈大愈會欣賞美腿……所以女仔着「黑C」行街，實在係有機會推高收視 。不過嚴正呼籲各位「黑C」迷，要保持克制，千萬唔好過火位……知道冇？