政壇：政商定格：梁焯輝退休真言贈同事

加入政府三十四年嘅規劃署署長梁焯輝退休，面對規劃議題愈嚟愈具爭議性，好似新界東北新發展區咁搞到群情洶湧，佢就留低八字真言「以誠立城，劃出彩虹」送贈同事，即係規劃師要用心同誠意建設城市，面對批評都以平常心看待，佢嘅墨寶鐵畫銀鈎，原來係書法高手。

規劃署同事尋日同梁焯輝餞行，佢好有心思咁自費準備咗二百幾份小禮物送畀大家，就係有佢墨寶嘅USB記憶手指，上面寫有「以誠立城」四字。除咗有小禮物外，梁焯輝伸大筆一揮寫咗「劃出彩虹」四個大字，更裝裱好埋，送畀部門。