政壇：政商定格：曾昭穎high tea享湊女樂

恒豐企業主要股東李德義兒子李建勤一年前被高院裁定，要向前妻曾昭穎支付天價十二億元贍養費，日前話只收得「零頭」嘅曾昭穎忙於訴訟之餘，原來仲有時間享受湊女樂，上周五佢就帶埋愛女、工人，同兩位女性友人喺中環置地廣場Cafe Landmark輕鬆high tea，坐足個多小時先至離開。

因為官司做咗城中名人嘅曾昭穎出入好小心，當日就見有兩個疑似保鏢坐喺遠處隱蔽位置用餐，同曾昭穎坐嘅枱相距約十呎，表面上好似互不相干，但兩人全程就金睛火眼咁望實曾呢張枱。佢嘅四歲囡囡剪咗個冬菇頭，非常活潑可愛，成隻白兔仔咁跳跳紮坐唔定，曾昭穎見囡囡食得咁開心，好幾次都忍唔住伸手輕撫愛女嘅頭髮，臉上不期然泛起幸福滿足嘅笑容，真係有女萬事足。