政壇：搞搞政：林鄭陪家人過「世界末日」

聖誕將至，唔少官場中人都趁機抖一抖，政務司司長林鄭月娥決定由下周三開始離港休假十一日，由本月十二日至二十二日下午放假，咁啱佢嘅假期就橫跨咗被預言為世界末日嘅十二月二十一號，據聞林鄭會飛過英國探望家人，咁算唔算世界末日最緊要同屋企人一齊呢？

林鄭放假期間，由民政事務局局長曾德成署任政務司司長職務。同樣喺世界末日期間放假嘅仲有保安局局長黎棟國，佢就由二十一日起一連九日休假，副局長李家超署任佢嘅工作。

高官放假樂呵呵，行政會議成員羅范椒芬（羅太）就無咁好彩，佢嘅放假大計仲接二連三胎死腹中添！羅太當初決定出任候任辦主管時，已事先張揚會同家人去非洲旅行，仲未出發先興奮買埋單反相機，但因立法會重組架構方案拉布多時，結果佢要放棄休假、留港護航。上月下旬，佢原本計劃過美國同囝囝一齊感過恩節，又撞正今年嘅港區全國人大代表選舉簡介會，結果又冇假放。