政壇：劉江華入官場恐失地盤

民建聯副主席、沙田區議員劉江華與同黨觀塘區議員陳百里有望加入政府做問責官員，但佢哋入政府前需要辭去區議員職務，之後就要進行替補選舉，建制派雖然因為官場再多兩個位而高興，但區議會任期內中途換人，「替補」參選者幾乎都冇好下場，最終可能贏個官位輸番個議席。

本報尋日率先報道，劉江華極有可能出任政制及內地事務局副局長，而陳百里就做商務及經濟發展局局長蘇錦樑嘅政治助理。劉江華屬於田心選區，地盤屬公民力量，但劉若請辭，公民力量或者區內建制派攞唔攞得番個席位好難講。事關前南區區議員陳岳鵬當年因加入政府請辭，個議席就相讓畀前公文袋嘅司馬文，之後建制派想搶番個議席都無功而還。雖然係咁，副局長同政治助理嘅人工比區議員酬金多五至十倍，人望「錢」途都無可厚非。