政壇：林公公護主擦錯鞋

前政務司司長林瑞麟（林公公）一向護主心切，佢雖然已經投奔校園，但卻依然不改忠心。佢同前律政司司長黃仁龍同獲樹仁大學頒發榮譽法學博士，尋日一齊出席畢業禮，黃仁龍被記者追問對基本法委員會副主任梁愛詩言論嘅睇法時，藉詞自己啱啱先喺英國返來，冇詳細睇過梁愛詩嘅發言故不作評論。但同樣喺英國返港嘅林公公就第一時間撲出嚟，話香港嘅法治精神同制度已經落實得好好，唔覺香港嘅法治烏雲密布喎。

不過林公公咁講根本係擦鞋擦過龍，亦講得唔正確，事關過去本港司法制度經常出現唔公平情況，有時判決顛倒是非黑白，而且又選擇性檢控。至於廉政公署對於調查貪官污吏亦放軟手腳，甚至出現包庇，淨係睇「貪曾」前特首曾蔭權爵士貪盡海陸空後，廉署至今仍未有任何行動就知幾荒謬喇！