政壇：單雞畀乳鴿圍啄

立法會選舉之後白鴿黨議席大減，原主席何俊仁求去，之後白鴿由邊個帶隊傳言多多。一度盛傳將會由立法會議員新丁胡志偉同黃碧雲任主席，做到換血效果，可惜後者上任做議員即見真章，其一舊雲表現慘不忍睹。近日又有風聲話白鴿將由重返議會嘅老將單仲偕（單雞）帶隊，但新名單啱啱傳出，政圈已傳乳鴿作反嘅消息。事緣白鴿新鮮人對黨內繼續「大佬文化」、舊人把持黨政有怨言，仲有新人打算挑戰單雞添！

選舉辯論逼表態

今個月十六號，白鴿黨就會選出新領導層，報名期將喺下星期二截止。一直唔肯話選嘅胡志偉近日終於表示出選，但就係選副主席，主席一職極有可能由現任副主席頂上，變相成為劉慧卿同單雞之爭。不過，卿姐出選似乎唔合白鴿求變革嘅原則，所以主席之位好大機會輪到單雞頂上。咁咪即係還原基本步，咩血都無換過？

去年區議會選舉白鴿黨已受重創，但係港島稍為保住啲議席，不過立法會選舉時卻唔係區內人士出選，而係群星拱照空降嘅單雞，惹嚟部分人不滿，而單雞中間偏右嘅政策取態亦係導火線。據聞唔滿意嘅人正密謀挑機，搭個台整個選舉辯論逼單雞表態。

至於將會有八十後出任副主席一職嘅傳聞，似乎亦無咗件事。原本除咗蔡耀昌外，乳鴿之輩如南區區議員羅健熙同葵青區區議員林立志亦先後表態有意參選。但胡志偉忽然改選副主席，年輕一輩當選機會已大減。

其實乳鴿踴躍出選亦唔見得係好事，佢哋互相鎅票，反而會造就舊人當選。講嚟講去，白鴿換血之說，喺乳鴿眼中似乎只係一個望得穿，飛唔上嘅玻璃天花。