SUN微博：網絡小說：廢渣中嘅極品

早幾日正義傳媒出咗《好報》，咁啱爛果就出咗中期業績，都唔知係咪咁邪，爛果蝕到入晒肉，少膽虫忍唔住講咗句︰「惡有惡報，若然未報，時辰未到。依家真係應驗晒喇！」霎時間，成層樓嘅同事都面有難色咁望住我，少膽虫冷不防回頭一望，淨係見到淫賤黎企定定喺度，「少膽虫，同我入房」。少膽虫即刻嚇到褲衩濕濕哋，死狗咁行入房。

「老細，其實我對你嘅欽敬，猶如滔滔江水，連綿不絕；又好似黃河氾濫……」

殊不知一向鍾意聽人擦鞋嘅淫賤黎竟然喝斥少膽虫︰「夠喇！你知唔知點解要叫你入房？」雖知平日講錯嘢，只要一同淫賤黎講番啲好話，佢就會笑到烚熟狗頭咁，乜都唔記得，但唔通少膽虫今次真係瀨咗嘢？呢個時候，淫賤黎仲遞咗封信嚟，仲話︰「你明o架喇！」少膽虫惟有使出影帝嘅演技，喊晒口話︰「老細，唔好啊！下次唔敢喇！」只見淫賤黎一臉茫然，「你講咩呀？升職加薪都唔好？」

人生有起有跌，但呢個起伏真係太大，少膽虫實在忍唔住問句︰「老細，公司唔係蝕錢咩？仲有得升職加人工？」估唔到淫賤黎聽到唔單止唔嬲，仲笑騎騎咁講︰「你識咩呀，盤數唔差啲，邊有得學台灣爛果咁賣盤掠水呀？我計過喇，犧牲少少員工又可以賺多成個開！」聽到呢番「妙語」，少膽虫肅然起敬，由衷地佩服淫賤黎嘅「雄才偉略」︰「果然係廢渣，仲係廢渣中嘅人才！」之後淫賤黎又講咗句︰「睇你平時服侍得我咁舒服，氹得我鬼咁開心，先留你喺我身邊做私人秘書！」啪一聲，少膽虫覺得臀部有啲痛，睇嚟今晚又有排忙喇……