SUN奇古怪：Sun潮語：【喪X】

最近睇到一條外國電影預告片，片名叫《World War Z》，係由呢排因香水廣告紅到inevitable既畢比特主演，內容大概係講「喪屍」襲地球之類。真係唔明白美國人點解咁鍾意拍喪屍片，尤其係近年拍到連林肯總統都要揸槍打喪屍，莫非美國經濟差到人人好似活死人，個個做到生不如死，活得似喪屍？不過連靚佬畢叔都要拍喪屍片，證明喪屍呢條橋真係長玩長有。

「喪屍」呢個詞本身已經好喪！港式粵語中「喪」係解喪失理性，不能自控，形容一種瘋癲瘋狂嘅狀態。

但係「屍」即係死屍咁解，係無生命嘅肉身，試問一個已死嘅軀體又點可以癲喪起黎？仲要陷入瘋狂狀態？呢個景像足以繪影繪聲地形容「喪屍」嘅恐怖！

近年香港好多人開始廣泛使用個「喪」字，好多年輕一代，例如八九十後，開口埋口都加個「喪」字，以至令「喪」字成為百搭潮語之一。喪嘅讀音係喪失嘅喪，唔係喪禮嘅喪。

任何行為都可以加個「喪」字開頭，去加強表達事情嘅瘋狂程度。例如玩得勁叫「喪玩」、蒲得勁叫「喪蒲」、喊得勁叫「喪喊」、笑得勁叫「喪笑」，諗極都唔通，就要「喪諗」，畀狗追要「喪跑」，就算喺社交網絡好like一D野，都可以變成「喪like」，「喪」到不能自拔。

香港地生活真係幾「喪」!無他……香港真係好多「喪友」，尤其係有錢又有權嗰班，不斷「喪屈機」，「喪扭曲」遊戲規則，小市民經濟上無啖好食，政治上又話唔到事……多數服從少數，就算十幾萬人上街「喪嗌」，班大帝都可以當你無到，真係唔喪就假！標題「喪X」個X到底代表咩？你自己填啦！估中無獎。