政壇：搞搞政：林鄭早年跟林煥光學嘢

官場三十年，人生嘆幾何！今日已貴為政務司司長嘅林鄭月娥同行政會議召集人兼平機會主席嘅林煥光，原來早在三十年前已經拍過檔，當時林鄭啱啱入政府，半年後就跟林煥光學嘢，做名正言順嘅妹妹仔，尋日佢哋一齊出席個活動話當年，林鄭最記得以前個「廚房」唔熱又唔凍。

林鄭尋日講起做妹妹仔嘅時代，話林煥光好照顧佢呢個新人，放工後，大家仲會一齊出去打波飲嘢，非常享受，所以從來冇諗過劈炮唔撈添！林煥光就話，當年大學畢業後，差啲就入咗恒生銀行做見習生，但成世仔淨係去過廣州嘅佢，眼見政務官有機會去英國牛津大學進修，所以最終決定棄商從政做政務官，試過帶隊去拆寮屋，班村民見到當時一把長髮造型嘅佢，即刻嫌佢未夠班，大鬧：「搵個死飛仔嚟，叫個大啲嘅出嚟！」

活動上有年輕人為官員發明幾項法寶，佢哋不約而同對可以吸走睡意嘅「吸取睡意機」最有興趣，林煥光話佢為官多年，最驚出席立法會會議，因為議員發言九成都係講無謂嘢，講來講去都係三幅被，有咗呢部機就掂喇。尊貴嘅立法會議員，聽到未？