政壇：老外入籍司馬文選人大

南區區議員司馬文係荷蘭人，之前本想參加立法會超級區議會或者港島區直選，辛辛苦苦攞到中國籍後，卻因公文袋唔肯支持而被迫棄選，其後憤而退黨，不過，佢轉換國籍嘅行動都冇白費，事關佢依家決定參加今屆港區人大代表選舉，聽日就會去報名。

參選港區人大除咗要有中國籍，亦最少要攞夠十個選舉團成員提名。據知司馬文至少已攞到十五個提名，清一色係泛民人士，包括幾位前公民黨黨友、三名泛民立法會議員莫乃光、衞生服務界李國麟同民協馮檢基等。白鴿黨就縮骨到話要開過中委會至決定係咪提名佢喎。雖然大家都知司馬文勝算極微，但佢今次參選已經創造歷史，包括成為今屆港區人大選舉唯一一位泛民參選人，仲可能係歷來首位參選港區人大嘅老外。

司馬文對今次選舉好認真，仲發表參選人大政綱，其他港區人大參選人好少會咁做。