政壇：姚思榮撲火玩低調

臨近歲晚，經營有問題嘅中小企業大都會趁呢段時間痛快了斷。日前信成假期全線五間分店忽然停業，好多報咗團、交咗定金嘅市民徬徨無助，有啲獲退款支票嘅人又話畀銀行彈票，真係嚇驚唔少人，不過，件事發生以來，政府高官、行業代表甚至公司高層都好似隱形咁，立法會旅遊界代表換咗人，新丁姚思榮至今只就事件講過一次嘢，低調作風同以往謝偉俊做旅遊界議員時嘅表現截然不同，到底佢係玩低調，定係唔識爭風頭呢？

衝擊中小旅行社

今次信成出事，據知受影響嘅旅客已經達二百幾人，佢哋報咗團冇得出發、打亂晒計劃已經夠慘，更多人關注緊畀咗信成嘅錢攞唔攞得番。身為業界中人，亦有佢哋嘅擔心，事關家吓正值聖誕、新春報團旺季，好多市民家吓已經度緊外遊大計，信成事件難免動搖佢哋嘅消費信心，尤其係中小型旅行社更加擔心生意受損。

弔詭嘅係，事發以來政府高官、業界代表甚至公司高層都冇影，姚思榮作為業界嘅立法會議員，都只係講過一次佢收到嘅求助數字，唔見佢喺鏡頭前現吓身，高調咁陪啲求助人跟進吓問題，更進一步穩定吓消費者嘅信心等，業內發生咁大件事，佢都按兵不動，到底係新丁捉到鹿唔識脫角呀？定係佢奉行低調政策呢？

我哋搵過姚思榮想八吓呢件事，佢助理話佢尋日唔喺香港。