託兒設施缺又殘 港產官僚懶懶閒

幼吾幼以及人之幼,呢句說話聽慣聽熟,但做唔做到又係另一回事。老實講,香港人為口奔馳,好多人連照顧自己子女都有困難,仲邊有餘力照顧別人子女呢?

嗱,香港人幼吾幼嘅煩惱真係好大o架,大到可以出研究報告。有婦女同社區組織委託大學做咗項研究,發現為人父母真係擔子千斤重,為咗照顧子女經常面對經濟、精神、就業及個人發展等生活壓力。所以話啫,做人難,做父母更難,做窮爸爸窮媽媽就難上加難!

好似一位單親媽媽咁,獨力照顧一個患有中度智障嘅十七歲女兒,試過外出打工搵食,結果女兒無人照顧,搞到曠課、遊蕩甚至鬧上警署;迫於無奈辭職睇住個女,又要面對手停口停嘅沉重經濟壓力。唉,幼吾幼以及人之幼,邊個可以幫呢班求助無門嘅父母呢?

唔係喎,社區唔係有託兒服務嘅咩?嗱嗱嗱,問題就喺呢度嘞。官老爺懶懶閒,託兒設施長期不足,所以咪搞出一幕幕可憐天下父母心嘅現實處境悲劇囉!

呢,上述研究批評現時託兒設施好唔掂,仲臚列出五宗罪添,包括服務名額不足、服務欠缺彈性、收費高昂、宣傳不足、資助託兒服務欠缺監管等等。團體促請港府撥亂反正,並設立「全民照顧兒童津貼」,向十六歲或以下兒童每人每月發放一千元,而特殊需要兒童每月發放三千二百元,以減輕家長經濟負擔。

咁講啦,發放津貼唔係唔可以研究嘅,但講到尾,最關鍵都係增加託兒設施,一來基層兒童幼有所託,二來家長可以搵工自力更生,咁先至係治本之道吖嘛。當然啦,託兒收費亦應該適當調減,如果唔係,設施再多都係等如將清貧兒童摒諸門外o架咋。

好心港產官僚生性啲啦,託兒服務長期天殘地缺,居然一直闊佬懶理,唔嗲唔吊。難為前特首曾蔭權爵士仲叫市民生三個,佢就話可以向權貴黐飲黐食啫,生夠三十個都無問題啦,基層家庭搵食艱難,港產官僚又關人個關,生三個邊個照顧呀?

所以話啫,做人父母唔容易,皆因香港欠缺用心為民嘅父母官。港產官僚唔好咁冷漠嘞,快快改善託兒服務啦,至多咁吖,如果你哋真係生性頑劣唔聽人講,太一叮咪當教細路仔咁教你哋囉:聽話啦,唔係就藤條炆豬肉o架嘞,叮!

第一手消息請下載on.cc東方互動iPhone/iPad/Android/Windows Phone Apps