Sun奇古怪：Sun潮語【Exact7ly】

香港自開埠以嚟都係一個華洋雜處，中西合璧嘅城市。記得以前有人講過香港人天生就係雜種，其實雜種都幾好呀，通常混血兒都係靚仔靚女，根正苗紅呢啲純種思想只係農民社會嘅古老信仰，可能只有某些粉皮，先會刻意追求。所以喺香港生活，先要習慣求同存異，香港人咩都鍾意炒埋一碟。生菜魚肉同碗仔翅可以兩溝，日常語言都係中英並用，甚至係中英日韓文幾溝都仲得。

正因香港係對全球開放嘅自由港，思想百花齊放，潮語至能夠生生不息咁發展同傳播。港式粵語不單中英夾雜，今時今日甚至將粵語粗口融入英語，潮語「Exact7ly」正正就係例子。

英漢字典中「Exactly」係一個副詞，第一個意思係確切地、精確地、完全地咁解，亦有恰好地，正好地嘅意思，對應嘅口語對話就係「一點不錯」。如果要加強「Exactly」嘅語氣，就可以加個柒字係中間，變成「Exact7ly」，當然係用廣東話發音，成個字嘅讀法就變成「Exact – 柒 – ly」!

當中柒字係粗口字嘅發音，書寫方面就可以「Exact7ly」去強化語氣。用廣東話拼英文字就自古已喺香港流行，如多士和士多都係Toast同Store嘅廣東話譯音，加埋粵語粗口落英文，去增強說話嘅狠度與力度。如此類推，好多英文字都可以玩，例如Very可以變成Ve-L-ry，Sorry都可以變成Sor9ry…等，有時間不妨試吓玩－港式粵語－Inevit7able！