政壇：政商定格：政商名流齊賀《FLASHon》兩歲生日

東方報業集團出版嘅時尚周刊《FLASHon》，話咁快出版咗兩周年，尋晚喺九龍Ｗ酒店舉行生日派對，數百名政商名流盛裝出席，齊齊見證周刊引領潮流品味嘅魅力。英皇集團主席楊受成、恒基地產副主席李家誠（Martin）、富商趙世曾、佳能香港高級副總裁鄧慶治及兒子鄧振豪，以及Sony Computer Entertainment香港董事項明生（James）等名人齊捧場，氣氛high爆。

大讚印刷精美 具潮流觸覺

Martin話，自己唔多懂得扮靚，平時嘅衣着配搭會交由太太徐子淇操刀，但佢仍緊貼潮流，大讚《FLASHon》辦得好好。佢又話，原本太太都打算一齊嚟到賀，點知臨時搞唔掂三個小朋友，所以佢隻身到來。問Martin對住大女、二女及細仔，有冇特別偏心寵愛邊個？佢好醒目咁答：「個個都一樣咁錫！」不過話口未完，Martin佢就自爆，太太話佢錫兩個女多過囝囝喎！

主理電子遊戲生意及經常周圍去旅行嘅James，最掌握時下年輕人嘅喜好，佢大讚《FLASHon》好有潮流觸覺，而喺一眾免費派發嘅刊物當中，《FLASHon》嘅印刷相當精美，令人睇得好舒服。

James又透露，嚟緊又要忙於為下月舉行嘅亞洲遊戲展招募人手，今次除咗繼續去天水圍招工之外，仲首次會去東涌請人，預計共需要招聘一百五十人。