政壇：搞搞政：拉布拉出火泛民鬧長毛

立法會財委會審議長者生活津貼撥款案多時，先受阻於泛民同工聯會攜手，依家又因為長毛嘅修訂動議表決唔到，雖然政務司司長林鄭月娥都親自致電長毛，希望佢「高抬貴手」，但長毛尋日又提咗數百項動議繼續拉布。長毛馬拉松式拉布，點着嘅火頭除咗燒到長者外，仲連泛民政黨都受累，話畀逾百歲長者當面痛斥，搞到有人私底下都游說長毛放手喇！

據泛民議員訴苦，一位現年一百零二歲嘅長者痛斥佢，話議員咁樣拉布，擔心拖到自己仙遊嗰日，一毫子都攞唔到。百歲老人仲警告，到時佢啲子子孫孫一定唔會放過泛民班人喎！有溫和泛民為咗自保，不惜「私通外敵」向建制派獻計「剪布」，針對長毛嘅動議如將長津金額「一年一檢」，分拆成「兩年一檢」、「一年兩檢」、以至「十年九檢」等，話只要建制派「突襲」，集體投票通過其中一項動議，其餘百多項一式一樣嘅動議就會全部作廢。不過建制派並冇接納。

呢場長津拉布戰幾時收科真係冇人知，雖然依家泛民大黨已經唔撐長毛，但民間就認定佢哋有罪在身，鬼叫你判斷太錯、縮沙太遲咩？