政壇:《南早》又烏龍梁家傑變詩姐

本港英文報章《南華早報》又「擺烏龍」,繼前年誤將國家主席「胡錦濤」個中文名錯寫成維權人士「胡佳」,去年五月報道拉登死訊時,又將「Osama」(拉登)個名寫錯做「Obama」(美國總統奧巴馬)。點知該報尋日又「張冠李戴」,將公民黨黨魁梁家傑批評港澳辦副主任張曉明署名文章部分觀點,夾硬套落基本法委員會副主任梁愛詩把口,仲出埋詩姐張相添!《南華早報》尋日A1頭版報道,張曉明撰文指香港應該適時完成《基本法》二十三條立法,又堅稱人大常委會有解釋《基本法》嘅權力,梁家傑反駁指張曉明嘅文章不只違憲且不道德。不過最令人難以置信嘅係,該報竟然喺頭版放上詩姐嘅圖片,並將梁家傑嘅批評當成詩姐嘅言論。稍有常識嘅都知道,以詩姐嘅身份冇乜可能同張曉明公然「打對台」,所以該報今次一如過往,都係錯得離譜。

《南華早報》將本身係男人嘅梁家傑變成女人,又將詩姐言論「泛民主派化」,唔知情嘅人仲驚訝點解詩姐會批評港澳辦官員。另外值得留意嘅係,今次已經係《南華早報》近三年內第三次搞錯重要資料,還記得有次該報歸咎有外國員工唔識睇中文所以出錯,雖然唔知今次又會用乜理由去解釋,但至少該報應該還詩姐一個清白囉。

第一手消息請下載on.cc東方互動iPhone/iPad/Android/Windows Phone Apps

《南華早報》尋日A1頭版將梁愛詩當係梁家傑,批評張曉明嘅署名文章。