政壇：范國威「參巧」醜死人

新一屆立法會唔經唔覺已經履新近個半月，新丁議員各有表現，有人搶咗風頭，有人公開出醜，亦有人變咗潛水一族。不過新丁連環犯錯，而且仲係唔識字嘅低級錯誤就陸續有來，繼建仔鍾樹根、公文袋郭家麒之後，泛民陣營嘅范國威又一次表演錯別字。

辯稱助手寫錯

最新呢宗出醜事件輪到新民主同盟嘅范國威，日前柴灣道長命斜大車禍造成三死數十人受傷後，身兼交通事務委員會副主席嘅范國威不敢怠慢，隨即去信委員會主席陳鑑林，要求盡快召開特別會議問個究竟。不過呢封信就錯漏百出，信中內容又詞不達意，譬如將參考寫成「參巧」；籲「早作適當安排」又寫成「早作適當安全」，後者都可以拆招係忙中有錯，前者就肯定衰唔識字、寫白字。

范國威接受查詢時，辯稱呢封信係由同事撰寫，又承諾以後會睇多幾次，小心覆核吓有冇錯字喎。佢嘅意思係助手寫錯，佢最多都係冇睇清楚之責啫。

點都好，新一屆議會開工唔夠兩個月，啲新丁已經接二連三犯錯出醜，鍾樹根將「子虛烏有」講咗為「子烏虛有」，郭家麒又將徹查事件嘅示威標語寫咗做「撤查事件」，今次范國威又衰一鋪，雖然佢哋人人事後都死撐一番，但除咗暴露佢哋粗心大意外，睇怕更多人會認為佢哋個人水平差。