融合教育問題多 官僚卸膊玩歧視

好多人都話，讀書可以改變命運，出人頭地，擺脫生活困境。不過今時今日，呢個講法就未必成立嘞，事關就算你想勤力讀書，亦未必可以得到良好教育。

點解咁講呢？嗱，大家睇吓平機會嘅融合教育研究結果就一清二楚嘞。報告踢爆融合教育問題多多，單係一個師資嚴重不足問題，已經令人匪夷所思。原來推行融合教育嘅學校之中，居然有一半教師從未接受任何融合教育訓練，而持有特殊教育專業證書或者大學學位嘅比率更加低至百分之一至二。即係話，教師濫竽充數，學生又點能夠獲得良好教育呢？

除咗師資唔掂之外，學校亦充滿歧視。研究結果指出，三成有特殊學習需要嘅學生曾被同學取笑，兩成六表示受欺凌，情況遠高於普通學生。嗱嗱嗱，做出歧視行為嘅唔止學生，連教師都係咁，向學生惡言相向有之，將學生物件丟出班房亦有之，問你服未。

唉，師資唔專業，返學被歧視，普通學生都出問題啦，何況係特殊學生？融合教育天殘地缺，究竟係對學生施予援手，定係存心靠害呀？

講起真係荒謬，融合教育已經推行十年，到依家仲係殘缺不全，千瘡百孔，簡直令人難以置信。至於點解會搞成咁，四個字講晒：官僚卸膊！

研究結果係咁講嘅，六成校長批評喺資助撥款、教職員培訓、人手編排、專業支援等各方面，都得唔到足夠嘅政府資助。所以咯喎，平機會炮轟融合教育遠遠未能令人滿意，問題嘅根源係缺乏資源、訓練同支援。

大家終於明白啦，由於官僚縮骨卸膊，所以學校資源不足，於是無力培訓師資，全面照顧學生需要。事實證明，當局推行融合教育，美其名鼓勵殘障及特殊學生入讀主流學校，增強自信，融入社群，其實係將學生當包袱踢畀學校，然後關人個關，乜都唔理，你話教育官僚個腦係咪有問題吖！

兩年前一名思覺失調症中四男生因為與同學及老師相處有問題，結果喺校園跳樓自殺，死因庭其後建議當局審視融合教育制度，以及為學校增撥資源。點知當局詐傻扮懵，完全當死因庭建議冇到。咁啦，港產官僚死不悔改，無可救藥，不如送佢哋去特殊學校接受再教育啦，叮！