SUN微博：打橫嚟講：卑賤生涯為啖飯！

科技進步，有咗互聯網，世界上，唔單只溝通方便了，資訊交流也頻繁了！本來，人與人之間的距離，好應該緊密至啱，但係，唔知點解，效果卻剛剛相反，個體竟突然孤立化，各人活於自己封閉的空間，愈來愈寂寞，不過，又愈來愈想講嘢有人聽，於是，大家全情投入對互聯網的虛擬世界裏發言，逐漸，這個無聲沉靜的冰冷領域，反而熱鬧得讓人關注。

政客見網上言論有影響力，遂又出現咗一批依附網上寫作的「黑工」，一群不會露真身的「文字工作者」，佢哋被稱為「五毛黨」，源自有人組織這批棍法精巧的「散兵游勇」，成幫結黨，在網絡世界上，發放有利出錢嘅老闆之言論，每條貼子，科水「五毫」，故有尊稱。

呢班五毛黨羽好有專業精神，邊個畀錢，就幫邊個做嘢，無分你我彼此，佢哋嘅宗旨，就係「無立場、無宗旨」，總之，有奶便是娘。江湖傳聞，有影視界的經理人，出重資「聘用」大量五毛成員不斷在網上唱好旗下小藝人，讚到佢會飛！果然，那寂寂無聞的茄喱啡就咁被唱好咗！當然亦有人出動五毛黨去監視同惡意打擊對手，傷毀別人。

呢類五毛黨生涯，查實很淒涼可憐，佢哋周不時要人格分裂至能搵餐晏仔，因為隨時讚人嘅，和鬧人嘅，都係佢同一個人，慘到痹。

最衰嘅都係嗰啲出錢請人做五毛黨，而自己唔敢現身嘅幕後黑手，真卑劣！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

就係敢爆

讀者可透過智能手機下載「東方互動」app，於「爆料」項上載影片，每個星期三《太陽報》及ontv同步大爆特爆！

email：sunweibo@opg.com.hk

「就係敢爆」網址tv.on.cc/hot