政壇：政商定格：瑞銀感恩節請食有情雞

感恩節雖然係美加嘅大節日，但原來唔少外資大行喺香港都會同員工一齊慶祝，好似瑞銀就喺尋日感恩節，由一眾管理層夾錢，訂咗六隻火雞同大量美食，慰勞一班手足。

其實，自從港股喺今年三月延長交易時段後，瑞銀嘅香港手足嘅食飯時間得番一個鐘，瑞銀亞洲股票衍生產品銷售部董事總經理Johnny于正人同其他做輪嘅同事日日食飯盒，食完後睇兩睇報紙、與同事傾幾句，眨吓眼又到開市，又趕又無啖好食。尋日係港股「加時」後第一次感恩節大食會，係少有嘅人山人海場面，佢哋直頭有人話「多人到好似年宵咁」。

第一手消息請下載on.cc東方互動iPhone/iPad/Android/Windows Phone Apps

于正人同一眾管理層訂咗火雞同美食，慰勞瑞銀一班手足。