政壇：搞搞政：曾蔭培退休圖賴死唔走

最近坊間熱論一套講述警隊高層權鬥嘅港產電影，隨即有傳當年警務處處長曾蔭培（YP）踏入退休年齡之際，外界一致睇好由阿Dick李明逵接任一哥，但當時就有消息傳出YP或會再坐一會。就喺同一時間，再有聽風者話阿Dick會過檔做懲教署署長，令YP再坐一會嘅傳言疑幻疑真。雖則當時阿Dick多次否認過檔，最後搞到佢使出一句：「生係香港警察人，死係香港警察鬼」，表明心志先至成功坐上一哥之位。

近日有人舊事重提，話當年YP喺離任警務處處長前不足一年，曾去信時任保安局局長要求留任多兩年。但據講該局長當時冇佢咁好氣，於是將封信彈畀佢大佬、時任政務司司長嘅「貪曾」煲呔曾。但大佬最後都幫唔到手，認真耐人尋味。

轉任新創建執董

一般高官退休後，除非得到批准，否則要過冷河兩年先可以加入私人機構，但當年YP退休後一星期，旋即傳出佢已向政府申請轉職嘅消息，效率之快實在令人咋舌，亦惹起唔少輿論批評。結果YP喺○四年六月出任新創建執行董事，再次激起社會批評，但當時公務員事務局強調YP轉職依足規定喎！