自由桂冠如雞肋 不要虛名要果實

甲：咦，香港又蟬聯全球經濟自由度最高地區喎。

乙：唓，都慣嘅啦，咁又點啫？你同我嘅經濟自由度會高啲咩？

甲：香港嘅評分隨時被新加坡追過。

乙：更加唔奇啦，香港呢幾年乜都輸畀新加坡，輸多樣都好正常啫。

甲：香港嘅自由度評分仲下跌咗添。

乙：咁就奇喎！香港愈來愈失控，政客愈來愈激進，無限拉布又得，舉龍獅旗又得，佔領政府總部又得，自由成咁，香港嘅自由度評分應該升到破紀錄至啱o架！

以上對白純屬虛構，如有雷同亦好正常。唔係咩？經濟最自由，香港年年有，加拿大費沙爾學會編寫嘅二○一二年世界經濟自由度報告，香港再度力壓新加坡，排名第一。至於具體分類評分咯喎，如果大家想知詳情，可以揭去新聞版面慢慢睇，太一叮只係想分享兩點，幫大家提提神。

邊兩點呢？首先係香港嘅得分由去年嘅九點一分跌至八點九分，同新加坡嘅八點六九分差距進一步收窄；其次，報告指本港開徵海外買家印花稅將影響投資環境，自由度評分或會被新加坡追過。大家係咪驚一驚呢？香港競爭優勢不斷流失，早就被新加坡拋離，如果連經濟最自由呢個齋缽都打爛埋，咁就真係危危乎咯！

所以話，對香港來講，呢頂經濟最自由桂冠愈來愈似一件雞肋，食之無味，棄之可惜。無錯，經濟最自由唔係唔好，甚至可以話係香港嘅標誌添，不過講到尾，香港經濟要持續發展，關鍵係要保持競爭力，道理就好似拳手出賽，如果皮黃骨瘦腳步浮浮，就算條金腰帶再閃閃生輝都嚇唔到人o架，一埋身肉搏就被人打低啦。

仲有呀，所謂盛名之下，其實難副，經濟最自由成為前朝政府胡混度日嘅藉口，反而搞到香港競爭力每況愈下。係呀，香港真係好鬼自由o架，油公司自由地加快減慢、公共交通機構自由地有加冇減、領匯自由地加租迫遷、高官自由地卸責卸膊、煲呔曾自由地黐飲黐食……你話嘞，咁樣嘅經濟最自由，對香港有乜幫助？對市民有乜好處？

自由桂冠如雞肋，不要虛名要果實。新政府千祈咪學前朝政府，捧住經濟最自由虛名發白日夢呀，快快急起直追，切實搞好經濟同民生，唔好令香港繼續沉淪吖，叮！