政壇：政商定格：「心蓮心」捐百萬建青年宿舍

「心蓮心基金」早前捐出一百萬元幫助播道兒童之家興建青年宿舍，中心前日開幕，Adler珠寶董事總經理Patti何彭慧嫻、醬油世家新抱Mahnaz Lee同印度富商夏利里拉家族成員Shirley Hiranand等，共襄善舉。

青年宿舍專為來自破碎家庭嘅十八歲以上年輕人而設，最多可提供二十四個宿位。身為虔誠基督徒嘅Patti話，雖然宿位唔算多，但總算係個好開始。佢慨嘆唔少年滿十八歲嘅兒童之家院友，夠年齡後就要離開，但因為種種原因無法與家人團聚，惟有「蝸居」深水埗劏房，生活捉襟見肘。

開幕禮上，一位十九歲女宿友現身說法，坦言未搬入新宿舍前，因為無法支付昂貴租金，一年搬十次屋。境況淒涼，Mahnaz同Patti聽見，都忍唔住眼濕濕。Mahnaz話，期望為宿舍籌得更多善款，將來擴建宿位，等更多無家可歸嘅後生仔有個溫暖嘅家。