政壇：搞搞政：神童鄺其志裸退馬會

港交所前行政總裁「神童」鄺其志舊年被傳與華人置業副主席劉鳴煒喺馬會泳池「爭執」，有傳神童撳咗劉鳴煒個頭落水，馬會收到投訴後裁定佢行為不檢，仲喺馬會張貼通告，暫停佢「遴選會員」會籍一年。事件有新發展，佢連最矜貴嘅遴選會員資格都被馬會褫奪，就算明年馬會肯恢復佢嘅會員資格，都只係一個普通會員。

其實神童從來都未回應過呢單嘢，令呢件事更添神秘色彩，究竟佢係咪真係撳低過劉鳴煒個頭落水呢？為乜要撳人個頭落水？依家仲係一個謎。我哋打過電話畀鄺其志問呢件事，但佢就話冇興趣回應喎，睇嚟佢都唔想再提。

除咗畀人凍結會籍外，我哋喺馬會網頁搵到最新嘅遴選會員名單，發現上面已經冇咗佢個名，即係話佢現階段暫時「裸退」馬會。據了解，就算明年初神童嘅會籍禁制期結束，仍要經馬會大董投票通過，先可以恢復會籍。