根據聖經記載，耶穌長大後喺約旦河受洗，而且喺呢度幫佢嘅門徒洗禮。所以，條河被稱為世界上最神聖嘅河流之一。本身係基督徒嘅工黨立法會議員李卓人上星期以國際職工會聯盟全球執委嘅身份，去約旦開國際職工盟一年一度嘅大會，而喺最後一日，佢去咗約旦同以色列交界參觀約旦河。
阿人喺河邊一唔為意失足跌咗落水，搞到全身濕晒。佢尋日喺社交網站專頁度仲分享咗張相，仲話自己跌落約旦河有如受洗，今次不枉此行喎。不過，張相顯示啲河水只浸得半個人，又冇牧師或傳道人喺隔籬，似沖緊涼多過受洗喎！