政壇：網傳自殺陳嘉華玩大咗
尋日有讀者爆料，懷疑豪華飲食集團太子爺Jeffrey陳嘉華為情自殺，話說佢日前喺社交網站貼出一張有大量藥丸散滿一床嘅相片，西貢區議員「哪吒」方國珊睇見，打電話畀佢又打唔通，嚇到差啲報警。Jeffrey知道「玩大咗」，急急澄清自己尚在人間，叫大家唔使擔心，並速速移除張相。
Jeffrey話的確有食藥，事關佢左邊大腿好痛，經中醫診斷患痛風，可能近日太多應酬飲酒所致，於是食止痛藥，冇諗過大家以為佢做傻事，而哪吒打畀佢時，咁啱電話冇電。佢坦言，近日因失戀而影響心情，但以佢樂觀開朗嘅性格，點會為情自殺吖！咁為乜倒晒啲藥丸出嚟影相？因住貪玩玩出禍呀！
陳嘉華（上）日前喺社交網站貼出一張藥丸相（下），被人誤會佢為情自殺。（讀者提供）