政壇：行政會議南海幫喜相逢
原來三位身兼行政會議成員嘅立法會議員葉劉淑儀、林健鋒同李慧琼都係南海鄉里，佢哋尋日就特登約埋喺立法會大樓影相留念，話要將張相寄返去畀南海鄉親喎！
兩位女士仲夾埋一齊着紫色衫，林健鋒就戴咗條紫色呔襯番兩位女士。點解揀紫色？葉劉話：「立法會啲櫈已經係黑色，唔想成日全黑，紅色又通常喜慶日子先會着，紫色幾好吖，多人鍾意嘛！」
葉劉又話唔知係咪因為風水問題，南海人好多從政，香港唔少前高官都係南海人，包括葉澍堃、梁愛詩、已故嘅黃星華等。林健鋒話佢南海鄉下依家興建緊一個南海會館記載南海歷史，唔知呢班南海政界人士嘅功過會唔會記載入去呢？
葉劉（左起）、林健鋒同李慧琼都係南海鄉里。