政壇：林煥光暗寸貪曾拖良策

身兼行政會議非官守議員召集人嘅林煥光話過，等平機會主席合約期滿後，佢唔會再申請續約，堅決留任行政會議向政府建言同發揮影響力。距離合約期滿仲有約三個月，佢尋日回顧過去平機會嘅工作，認為自己任內爭取無障礙通道有進展，反而改善少數族裔教育情況方面就成績麻麻，似係暗示前特首曾蔭權爵士對呢件事懶懶閒喎！

新政府耳目一新

特首CY梁振英上場後，迅速回應一眾公屋居民嘅訴求，要求盡快為一啲舊式、或者起喺山邊嘅公共屋邨興建自動升降台，方便居於上址嘅長者同行動不便人士出入，等佢哋多啲融入社區，身體同心理都健康得多。林煥光尋日認同，政府改善無障礙通道確實下過苦功。

除咗無障礙通道外，林煥光平機會任內都積極爭取改善少數族裔學生嘅教育情況，平機會去年發表過報告書，批評教育局融合教育失敗，令非華語學生唔可以有公平學習機會；平機會又向教育局提出九項建議，希望加強非華語學生學習中文嘅能力。平機會為少數族裔爭取權益，已經非一朝一夕，問題遲遲未有改善，擺明就係前朝政府懶懶閒啦。

其實「貪曾」拖延擱置嘅好政策根本就多不勝數，以往亦有唔少人曾向貪曾政府建言，可惜全部都石沉大海。CY上任後，好多嘢都耳目一新，將好多前朝遺毒一併掃除，林煥光堅決留喺行政會議，相信就係睇中呢一點。