八吋膠管留肚內 醫療事故鑊鑊甘

家陣去公立醫院做手術，簡直搵命博，博贏咗算好彩，博輸咗隨時唔死一身潺！

唔係危言聳聽o架，又有辦你睇嘞。有位五十九歲盲腸癌病人今年八月喺北區醫院接受腫瘤切除手術，醫生當時仲聲稱手術順利添，點知之後病人持續出現嚴重腹痛、傷口流膿等症狀，一直拖到十月底，卒之劇痛難忍去醫院急症室求診，先至發現醫生做手術時將一條八吋長引流膠管留喺病人體內，由於切口唔齊，懷疑係畀人強行拉扯撕裂，病人無端端又要捱多一刀取出膠管。

更離譜嘅係，北區醫院明知理虧，為咗遮掩醜聞，竟然懶好心要求病人及家屬保密，等佢哋唔使受到傳媒騷擾喎。你話喇，究竟邊個先至會怕受到傳媒「騷擾」呢？該院高層仲話，今次可能係拔喉嘅醫生欠缺經驗所致，聲稱院方十分關注事件，已即時透過「早期事故通報系統」向醫管局通報，並且已成立委員會詳細調查喎。

叮！八吋膠管留喺病人腹內，咁嚴重嘅疏忽，咁低級嘅錯誤，根本唔關有冇經驗，而係醫生冇帶個心返工就真，嚴格啲講，即係草菅人命。至於所謂調查咯喎，到頭來咪又係求其交份報告，敷衍病人，然後不了了之，咁嘅例子大家仲見得少咩。呢，病人就講得啱嘞，「醫院太過分，折磨完我，都冇交代。」係吖，做手術贈送紗布等細小物件就話見得多啫，八吋長膠管都可以留喺病人體內，點只係過分，直頭係匪夷所思！

所以話，醫療事故沒有最醜，只有更醜。係人都知，前食物及衞生局局長周一嶽渾渾噩噩，孭鑊多過食飯，搞到醫管局烏煙瘴氣，公立醫院七國咁亂，診錯症、開錯刀、打錯針、輸錯血，鑊鑊新鮮鑊鑊甘。正如有人話齋，公立醫院好似閻王殿，醫你唔死算你命大，入去之前最好諗清諗楚吖。

老實講，醫管局管理混亂，肥上瘦下，搞到前線醫護人員士無鬥志，逃亡潮愈演愈烈，公立醫院人手本來已經唔夠嘅喇，依家更加係七個蓋冚十個煲，唔出事至奇。嗱，有病就要醫，公立醫院病入膏肓，再唔盡快開刀動手術，遲早一命嗚呼。周一鑊呢位庸醫已經執包袱走人，接任嘅高永文係時候諗計執番正醫管局喇，如果繼續諱疾忌醫咯喎，盞累人累物嘅咋，叮！