SUN微博：全城推爆：港女人情薄續集

港女一句「給五百元人情就不要來了」，即刻全港見報，紅爆各大討論區，風頭仲勁過奧巴馬同羅姆尼。Sun微博尋日問：「自由市場，到底有幾多人肯畀八舊水睇一條八婆港女咀嘴切蛋糕呢？」本來只係拋出一條自由經濟學派嘅純經濟學術處境問題，絕對沒有影射任何人，估唔到咁快有人對號入座，「不覺不爽XD」，小編惟有講句「真不好意思」。

講番個「八」百人情先收嘅人家準老「婆」，又衰多鑊喇！港女早前嫌執紙皮、攞報紙回收嘅公公婆婆阻街喎，話阻到人哋「為錢生活趕去工作」，仲叫啲公公婆婆「找一份清潔工」，「不工作就請不要每天為了幾毛錢而阻礙別人吧」！網民最氣頂就係，長者執紙皮攞報紙咁慘，都係為兩餐啫，問公公婆婆點解唔搵清潔工做，又同晉惠帝問「何不食肉糜」有乜分別？港女都識話自己「不是開善堂」啦，唔通成街善長仁翁肯用最低工資請啲七老八十嘅長者咩？

家吓全城狂插個港女，真係好慘，仲為難咗佢未婚夫添，有絲打改埋歌詞，叫《貧窮不要來》，明寸某啲市儈港女「請」飲冇貧友喎。咦，唔知首歌會唔會喺港女請飲嘅「大酒店」度聽到呢？小編在此祝福對新人，希望佢哋嘅婚宴搞得成啦，豪有豪搞，平有平搞，去大牌檔搞都得o架，港女！

《貧窮不要來》

改詞：網民「音樂人情」

原曲：葉蒨文《黎明不要來》

貧窮 請你不要來 別讓夢幻婚宴 有你存在

Hotel加多三百蚊 Buffet Lunch可上菜

自備利是 迎入進內 #hoho#

假若你貧窮 不要 請不要來

就像路上乞丐 要拒門外 #ng#

在FACEBOOK的心聲 在各處轉發上載

沒料自己 誠實惹意外

不感唐突 八舊應該 從來未想過要改

倘若說錢財 我不理 我不志在

但若是爭三百 恕我難接待

黎飲的都請買飛 絕不可補貼著你

是日絕交 人別要來 #bye#