政壇：政商定格：富貴經民聯租千呎靚竇
由七位立法會議員組成嘅經濟民生聯盟（經民聯），由於未有聯合辦事處，佢哋啲職員一直好似游牧民族咁，要喺唔同嘅議員辦事處工作，但最近經民聯終於部署好基地喇。經民聯副主席張華峰尋日話佢哋最近已喺海富中心租咗個單位做總部，方便大家一齊做嘢，行過條天橋就到立法會。
據聞佢哋出手闊綽，租嗰個逾千呎單位，呎價接近五十元，月租最少五萬多元。經民聯主席梁君彥就話單位呎價都算合理。究竟係幾多錢？佢就懶神秘唔講。
相對泛民就冇咁富貴，好似「丐幫」社民連，會址已喺太子咁遠，依家仲因租金由一萬三千元加到一萬七千元，焗住要搬去再遠啲嘅荔枝角，社民連執委黃浩銘講笑話，新會址唯一好處係近荔枝角收押所喎。
梁君彥唔肯講經民聯總部月租幾錢。（資料圖片）