政壇：政商定格：姚珏傾訴留美辛酸史
著名中國女小提琴家姚珏，都捱過唔少苦頭，所以成名不忘公益，嚟緊十二月一日將為仁愛堂舉行慈善音樂會。
姚珏尋日介紹慈善音樂會之餘，仲笑談音樂之路。原來佢小時候唔鍾意學琴，每次都要姚爸爸逼佢學，估唔到學出癮來，從此琴不離手。
姚珏又自爆當年十六歲隻身留學美國，身上只有四十五元美金（約三百五十港元），過住三餐不飽嘅窮日子，四隻雞翼分兩餐食；為慳一蚊車費，徒步數公里路返學，嘗盡苦頭，但佢冇放棄追尋夢想，咬緊牙關過日子。
苦學成才嘅佢，不忘傳授成功秘訣，提醒家長盡早讓子女上台表演，增強自信。佢仲話懷孕時已胎教，得閒就拉琴畀BB聽，耳濡目染下，細女音樂感十足，從小拉得一手好琴。
愛才嘅姚珏（前排右三），勉勵一班小音樂家追尋夢想。後左為仁愛堂主席黃達東。