政壇：搞搞政：工商專聯爭做御用智囊

向被視為「貪曾」御用智囊嘅智經研究中心，過去提出嘅建議都被高度重視，早前特首選舉期間，智經更一度成為唐營嘅後援會。不過特首CY梁振英上台後，政圈各智庫重回起跑線競爭，巧合此時傳出香港工商專業聯會有意由低調實幹變得更走出前台，睇嚟有意同智經分一杯羹，爭奪政府嘅重要智囊地位。

工商專聯過去一直就社會各項議題進行研究，據聞佢哋內部深感過去太低調，所以有意日後轉趨高調增加影響力，包括稍後向當局反映對施政報告意見後，隨即召開記者會，另外對政改問題、標準工時立法等敏感議題亦不會迴避，希望提出切實可行建議。

工商專聯想轉趨高調亦同內部因素有關。今年初開始出任主席嘅前廠商會會長黃友嘉，素來公職多多並與政府關係良好，有助工商專聯「升呢」，而且工商專聯內有「梁粉」身影，包括前CY競選辦副主任何永謙等，對支持CY依法施政都有一定期許，增加影響力嘅諗法亦合情合理。