自行政會議成員林奮強獲批無限期休假後，一直冇再公開露面，記者連日來喺佢寓所同北角廉政公署總部外守候，都見唔到佢現身。尋日上晝十一點左右，反而等到基本法委員會委員兼港區全國人大代表譚惠珠步入廉署總部。
記者問譚惠珠嚟做乜，佢立即笑晒口咁話，今次到訪廉署同任何案件都冇關，只係同朋友食飯。咁同乜嘢朋友食飯？佢就懶神秘咁話：「我喺呢度有好多朋友o架！」
翻查資料，珠姐身兼廉署審查貪污舉報諮詢委員會同廉署保護證人覆檢委員會小組成員，到廉署總部同朋友食飯確實唔出奇。
譚惠珠現身廉署總部，搵朋友食飯。
