政壇：嫻姐贏民望輸友情

港大民意研究計劃尋日公布「十大立法會議員排名」，其中重返議會嘅工聯會陳婉嫻，近日企硬反對政府寸步不讓嘅長者生活津貼方案，成功贏得民望，以五十六點九分成為市民最熟悉嘅議員，緊隨其後嘅有立會主席曾鈺成，同行會新貴新民黨葉劉淑儀。嫻姐選舉時做不成票后，今次都算一吐烏氣，但係咪可以繼續企穩榜首就話唔埋。

一將功成萬骨枯

嫻姐呢排就長津一事頻頻曝光，議事廳內就同泛民議員交頭接耳商討對策，議事廳外振振有詞企硬要求七十歲以上長者可免審查領取長津。佢同政府硬碰硬嘅態度，誇張程度雖令唔少陰謀論者認為佢係無間道，但亦為佢喺泛民支持者中博得唔少掌聲，再加上支持佢嘅死硬派，要成為最熟悉嘅議員真係易過借火。

但成功係有代價嘅，值唔值就要自己衡量喇。唔知大家又有冇留意，嫻姐近排每次企硬總是一句「工聯會有好大壓力」掛在口邊，其實工聯會內部對嫻姐嘅做法有不滿已係公開秘密，細嘅就扭計話要退會，大嘅就發功施壓。究竟工聯會將投反對票抑或離場抗議曲線支持政府，依家仲係未知之數，好明顯佢哋內部正進行一場拖得一時得一時嘅鬥唔眨眼耐力挑戰賽，睇吓邊個忍唔住先行跪低。所以嫻姐嗰句「工聯會好多壓力」似乎係講緊自己，而佢今次企硬贏民意，絕對可以話係一將功成萬骨枯。

嫻姐今次贏得民望，但就好似輸咗工聯會嘅兄弟姊妹情，唔知有乜感受，但尋日左翼廿一、社民連同幾個大專組織就繼續第二波「黑頭人撐白頭人」行動，一班後生仔女拎埋拐杖去工聯會撐佢哋企硬立場、切勿跪低，仲帶塊照妖鏡放喺工聯會門口，話要照晒工聯會內諗住轉軚嘅牛鬼蛇神出嚟，免得工聯會受到妖氣所侵，手腦唔協調跪低喎。