弱勢政府無強將 拉雜成軍多洋相

正所謂，衰開有條路。新政府上場短短四個月，風雨不斷，是非不絕，管治班子醜聞爆不停，簡直係一醜未平一醜又來，令人嘆為觀止。

呢，話口未完又嚟多單。行政會議成員林奮強被指喺政府出招打擊炒樓之前，連續沽出手頭兩個住宅單位，賺咗一大筆，惹來偷步賣樓、利益衝突嘅質疑；仲有吖，對於高於開價嘅售樓差額，佢又解釋得唔清唔楚，開頭聲稱交易差額盡歸代理，後嚟又改口話捐畀地產代理嘅慈善基金，唔怪得畀人質疑企圖隱瞞非法回佣。唉，身為行會一分子，又係房屋政策嘅「師爺」，林奮強連瓜田李下嘅道理都唔識，仲要愈描愈黑，唔畀人質疑至奇啦。

食得政治呢行飯，預咗畀人用放大鏡照嘅喇，如果問心無愧，一五一十交代清楚咪得囉，點知佢講多錯多，前後矛盾。

嗱，地產代理已澄清慈善基金唔會接受客戶捐款，仲披露已獲廉政公署知會有關個案，希望配合調查添。今次連老廉都出埋，睇嚟真係手尾長咯。

林奮強係咪貪婪見仁見智，有冇偷步賣樓以及非法回佣，仲要等有關部門調查過至知，但講到個人品格同誠信咯喎，咁就認真有問題咯。你話嘞 ，佢一時一樣，次次解釋都有唔同版本，人哋究竟信邊個版本先？正如學者話齋，林奮強愈描愈黑，簡直係掘個窿畀自己踩，咁嘅政治智慧又點樣幫助政府施政呀！

講開又講，林奮強已經係新政府上台以來第三個捲入醜聞嘅管治團隊成員。發展局前局長麥齊光上任七日就被揭發涉嫌詐騙租津，火速落台，淪為史上最短命局長；而接任嘅陳茂波先捲入劏房風波，跟手又涉嫌酒後駕駛；呢次林奮強衰埋，下次唔知又會輪到邊個呢？

無計喇，治港人才凋零，新政府拉雜成軍，少不免有人濫竽充數，唔出事至奇。所以話，弱勢政府百事哀，行政、立法及司法互相對立，互拖後腿，政府施政本來已經舉步維艱，點知管治班子自己又唔生性，醜聞多多，香港想唔亂都幾難。

計太一叮話齋，香港缺乏管治人才，即係「港人治港」唔掂，而「港人治港」唔掂，即係「一國兩制」有問題，唔怪得回歸十五年來，香港人都冇好日子過喇。唔知北大人又有乜嘢計呢？叮！