SUN奇古怪：Sun潮語：【躁底】

中醫學有所謂「熱底」、「寒底」，主要指一個人嘅體質特性。銀紙有所謂「紅底」，即係紅色一百蚊紙。當然，賭話事啤都有「二仔底」，即係死跟，無料都要充四條。

咁「躁底」又係乜？好明顯係指一個人，躁狂成性，難以自控經常郁吓拍枱鬧人嘅人，就謂之「躁底」！有咩食療可治好「躁底」？對唔住，真係唔知！

「躁底」有分長期性同偶發性之分，亦有主動性「躁底」同被動性「躁底」。長期性「躁底」人士多數本身性格火爆，有時可能EQ低，個性帶點衝動，以致經常性「躁底」，遇到少少事唔合心水，就即刻發圍鬧爆。呢類人可能長時期被不合理對待，或長年累月被屈機，令本身個性有所扭曲，形成長期「躁底」。嚴重起嚟，甚至每日「躁底」多次，講真，對健康都會構成壞影響。不過有啲長期「躁底」人士又好難怪佢成日咁火，好似某位以「躁底」見稱嘅立法會議員，對住成班好似「Tree根」同「掌例暈」呢類議政水平極低嘅立會新丁，真係想唔激到嘔血都幾難，真係躁得有道理。

偶發性「躁底」就人皆有之，生活上周不時都會遇上一啲令人「躁底」嘅事。例如當你喺街度等咗好耐咪錶車位，卒之見到有人走，終於等到有位泊之際，唔知邊度突然殺出另一架車攝入嚟搶先泊咗個位，呢種情形唔止會令人「躁底」，有時仲分分鐘會引發暴力衝突。另一個例子係，當你坐港鐵，突然有強國大人容許孩子在車廂大小二便，再冷靜的人相信都會「躁底」！

秋風乍起，風高物燥，太易「躁底」始終對身體不好。不過最近見到有行會成員疑似偷步賣樓，但又把責任推畀老婆，如此不負責任嘅行為，真係令人「躁底」！