政壇：搞搞政：立會壞機揭何俊賢冇人識
立法會新大樓尋日下午發生疑似封咪事件。話說大約三點半鐘，內會正討論應唔應該成立退休保障小組委員會，突然成個會議室入面啲咪突然全部壞晒。
當所有議員發表意見後，內會主席梁君彥隨即要求響鐘五分鐘叫議員返嚟投票，但明明計緊時，投票鐘又唔知點解失靈唔響。五分鐘後，佢宣布開始投票，當所有議員都伸手撳掣時，又發現連個投票掣都壞埋，一眾既講唔到嘢又投唔到票嘅議員惟有無奈得啖笑。
梁君彥即刻叫議員舉手等秘書處職員叫名數人頭，點知個女職員竟然唔認得晒啲議員，除咗叫錯人民力量陳志全做「何志全議員」，仲唔記得漁農界何俊賢個名。嘩！何俊賢出名係立會內嘅高佬，有成六呎二吋高，竟然都唔認得，睇嚟佢要加強吓曝光嘞！
設計圖片及對白