政壇：動議唔夠票泛民自作孽
立法會內務委員會尋日討論係咪成立退休保障小組委員會，原先喺勞聯潘兆平投贊成票，加上工聯會同新民黨投棄權票嘅大好形勢下，如果泛民主派二十七位議員可以坐定定投票，通過動議根本冇難度。點知泛民有四個議員因事缺席投票，內會最後以三票之差否決咗呢個由工黨張超雄提出嘅建議，反映泛民真係一盤散沙，成事不足，敗事有餘，今次真係自作孽。
教育界葉建源、工黨李卓人同公文袋兩位議員都冇出席投票。葉建源話有學校臨時有嘢搵佢幫手，所以要早走；而公文袋兩位議員都話有嘢做投唔到票，至於李卓人就去咗外地開會唔喺香港。雖然佢哋四個都話有自己嘅理由而未能投票，但佢哋嘅選擇已將全民退保問題放在次要位置，唔怪得有人鬧佢哋講一套做一套喇。