政壇：理大阮太傳選人大

港區全國人大代表換屆選舉如箭在弦，據聞今年競爭異常激烈。由於有高等教育界背景嘅前浸會大學校長吳清輝、生物化學博士曹宏威，同著名骨科醫生梁秉中等都因年齡問題不競逐連任，按照慣例會有高教界中人頂上。據聞頂上嘅高教界精英非泛泛之輩，其中一人係理大副校長（學院發展及合作）阮曾媛琪。

有全國婦聯背景

消息指阮太一向關心中港事務，特別積極參與拓展內地社會工作及教育工作，又參與過四川地震災後重建支援工作，加上又係全國婦女聯合會執委，倘參選會有一定競爭力。我哋曾就此傳聞致電阮太位於理大嘅辦公室查詢，惟直至截稿前未獲回覆。

雖然阮太係咪會披甲上陣仍然撲朔迷離，但有意角逐連任嘅現屆人大就密密做工夫。消息指部分人大已開始拉票工作，人前人後以正「積極考慮參選」同「備選」等字眼交代參選意向，呢個間接洩露口風嘅做法，無非都係想同各方友好打定招呼，希望大家到時投票時多多支持；有部分人大則製作精美工作報告郵遞或電郵予各方友好，以政績希望再獲垂青支持。

另有人大則爆料，話有人已開始為搵邊啲人提名感到頭痛，因為過往佢哋都有搵喺政界打滾多時嘅梁振英、陳茂波及高永文等提名，但依家佢哋都進身官場，為免佢哋順得哥情失嫂意，所以有意唔再搵佢哋提名喎！究竟最終有否政府官員提名政界人士參選人大，相信好快有分曉。