副局政助氹氹轉 最怕官多手腳亂

毛伯伯講過，人多好辦事。咁官多呢？係好辦事定好累事？

嗱，大家好快就知答案嘞。新政府委任第三批副局長同政治助理，管治班子一下子增添七名成員，究竟呢班官場新血係施政好幫手定倒米壽星公，究竟新政府係官多好辦事定官多好累事，唔使幾耐就一清二楚嘞。

七名政治新貴包括兩名副局同五名政助，當中有傳媒人，有政務官，有大學教授，有退休警務人員，有政黨第二梯隊，亦有上屆舊面孔原位續任，可謂五湖四海，乜人都有。無論點都好，希望今次唔會學前朝政府咁七拼八湊，拉雜成軍啦，否則新政府等如自製炸彈，添煩添亂o架咋！

唔係杞人憂天o架，副局政助用人不當嘅後果可以好嚴重。呢，前任中央政策組首席顧問劉兆佳喺新書爆料，力指煲呔曾「衰十一」，即係犯咗十一項打擊個人威信嘅施政失誤，其中一項咪就係開設副局政助犯眾怒囉。貪曾當年一下子委任咗廿幾名副局政助，係就係人夠多嘞，點知醜聞仲多，唔只變成「八國聯軍治港」，仲變成「高薪養庸」，卒之佢嘅民望變咗浮雲，煙消雲散。

事實證明，官多未必好辦事，如果廢官庸官濫竽充數，官多反而好累事添。尤其係新政府弱勢捱打，動輒得咎，連屬於惠民措施嘅長者生活津貼都阻力重重，連吞敗仗，若然政治新貴又爆醜聞，授人以柄，咁新政府想唔多災多難都幾難咯。

嗱，呢班副局政助要減少爆發醜聞嘅危機，太一叮有條橋，就係戒甩前朝官場隱形俠作風嘞。大家都知，前朝副局政助多數係政治宅男宅女，甚少蒲頭做嘢，「養在深閨人未識」，認知度低到離譜，如果新一班政治新貴又係咁樣懶懶散散，不思進取，民望低到阿媽都唔認得，試問又點樣可以幫新政府實現「適度有為，穩中求變」嘅施政理念呢？

話時話，政府企硬要為長者生活津貼引入資產申報，其實計太一叮話齋，對呢班副局政助都應該設政治資產審查，邊個表現差劣成為政府負資產嘅，就要即刻執包袱自動消失。呢個建議絕對符合整體社會利益，無論建制派定反對派，都一定唔會無理取鬧，阻三阻四！

一句講晒，副局政助氹氹轉，最怕官多手腳亂。各位政治新貴唔該生生性性，唔好累人累物呀，叮！