次世代生活圈：o靚模練詠春夠薑唔怕傷

功夫片燃起習武心，八十後美少女習武學詠春，追求戲內的快、狠、勁。拿起八斬刀、揮動六點半棍，與師兄妹切磋間，體能反應日漸提升，即使過程瘀、痛、傷亦不言棄，皆因武者操練意志，恒守無悔。

武室內，二十六歲思琳與一眾師兄弟出招擋格，互搶攻防連環出拳。她眼中，這套面世數百年的拳術永遠時興：「你睇過《葉問》入面甄子丹身手，你會覺得詠春好型，一啲都唔老土。」

身為模特兒，今年七月，她為參加武打片試鏡學詠春。雖然不成功，但她仍一直練下去：「練練吓覺得好刺激，特別係黐手對打，你唔會知對手下一步，靠嘅就係一瞬間嘅反應。」

每星期抽兩、三日，反覆練習小念頭、尋橋、標指等三套路。雖然動作不變，但她卻看到自己進步：「反應快咗，大腿肌肉結實咗，所以嚟緊都有幾個朋友同我一齊練，當減肥。」學習借力打力，短時間直擊要害，詠春更成她們的防狼術：「依家就算遇到攻擊，我都識防備。」

展示臂上淡褪的瘀痕，思琳笑說：「初初見啲師兄練木人樁打到嘭嘭聲，咪又用力係咁打，點知就打到成隻手疼晒。」當初因為型而學武，說來有點膚淺，但亦是詠春，令她更欣賞父親。「父親後生開始學詠春，到依家都仲有練，我諗都係對功夫嘅一份堅持，唔會半途而廢。」